ਇਹ ਉਹ ਪਾਵਨ ਅਸਥਾਨ ਹੈ ਜਿੱਥੇ ਹਿੰਦ ਦੀ ਚਾਦਰ, ਤਿਲਕ-ਜੰਜੂ ਦੇ ਰਾਖੇ ਸਾਹਿਬ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਦੇ ਪਾਵਨ ਸੀਸ ਨੂੰ, ਦਿੱਲੀ ਚਾਂਦਨੀ ਚੌਂਕ ਤੋਂ ਸ੍ਰੀ ਅਨੰਦਪੁਰ ਸਾਹਿਬ ਲੈ ਜਾਂਦੇ ਹੋਏ ਭਾਈ ਜੈਤਾ ਜੀ ਇਕ ਰਾਤ ਠਹਿਰੇ ਸਨ। ਭਾਈ ਜੈਤਾ ਜੀ ਜਦੋਂ ਟਾਂਗਰੀ (ਡਾਂਗਰੀ) ਨਦੀ ਪਾਰ ਕਰਕੇ ਅੰਬਾਲਾ ਪਹੁੰਚੇ, ਤਾਂ ਉਨਾਂ ਨੇ ਗੁਰੂ ਸਾਹਿਬ ਜੀ ਦੇ ਪਾਵਨ ਸੀਸ ਦਾ ਟੋਕਰਾ ਇਕ ਜੰਡੀ ਦੇ ਦਰੱਖਤ ਹੇਠਾਂ ਰੱਖਕੇ, ਕੁਝ ਚਿਰ ਆਰਾਮ ਕੀਤਾ, ਜਿਸ ਅਸਥਾਨ ਤੇ ਗੁਰਦੁਆਰਾ ਸਤਿਸੰਗਤ ਸਾਹਿਬ ਸੁਸ਼ੋਭਿਤ ਹੈ। ਉਥੋ ਪੁੱਛਣ ਤੇ ਭਾਈ ਜੈਤਾ ਜੀ ਨੂੰ ਪਤਾ ਲੱਗਾ ਕਿ ਕੈਥ ਮਾਜਰੀ ਵਿਚ ਹਿੰਦੂਆਂ ਦੇ ਕੁੱਝ ਘਰ ਹਨ। ਕੈਥ ਮਾਜਰੀ ਵਿੱਚ ਵਸਦੇ ਪੀਰ ਤੁਅੱਕਲ ਸ਼ਾਹ ਨੇ ਭਾਈ ਜੈਤਾ ਜੀ ਨੂੰ ਭਾਈ ਰਾਮ ਦੇਵਾ ਦੇ ਘਰ ਠਹਿਰਾ ਦਿੱਤਾ । ਭਾਈ ਰਾਮ ਦੇਵਾ ਨੇ ਸਾਰੀ ਰਾਤ ਸ਼ਹੀਦ ਸੀਸ ਤੇ ਪਹਿਰਾ ਦਿੱਤਾ ਤੇ ਭਾਈ ਜੈਤਾ ਜੀ ਦੇ ਇਥੋਂ ਅਨੰਦਪੁਰ ਸਾਹਿਬ ਵੱਲ ਚਾਲੇ ਪਾਉਣ ਤੋਂ ਬਾਦ ਸਾਰੀ ਉਮਰ ਇਸ ਪਵਿਤੱਰ ਅਸਥਾਨ ਤੇ ਧੂਪ-ਬੱਤੀ ਕੀਤੀ। ਅੱਜ ਵੀ ਇਸ ਪਾਵਨ ਅਸਥਾਨ ਤੇ ਹਜਾਰਾਂ ਸ਼ਰਧਾਲੂ ਨਤਮਸਤਕ ਹੋ ਕੇ ਆਪਣਾ ਜੀਵਨ ਸਫਲਾ ਕਰਦੇ ਹਨ।
